0:00
/
1ܗܵܝܓܵܗ ܝܼܫܘܿܥ ܗܘܼܡܙܸܡܠܹܗ ܥܲܡ ܟܸܢܫܹ̈ܐ ܘܥܲܡ ܬܲܠܡܝܼܕܘܼ̈ܗܝ. 2ܒܹܐܡܵܪܵܐ: ܥܲܠ ܟܘܼܪܣܝܵܐ ܕܡܘܼܫܹܐ ܝܬܸܒ̣ܠܗܘܿܢ ܣܵܦܪܹ̈ܐ ܘܦܪ̈ܝܼܫܹܐ. ܟܠ ܡܸܢܕܝܼ 3ܗܲܕܟ̣ܵܐ ܕܐܵܡܪܝܼ ܠܵܘܟ̣ܘܿܢ: ܢܛܘܿܪܘܿܢ ܘܥܒ̣ܘܿܕܘܿܢ. ܐܝܼܢܵܐ ܐܲܝܟܼ ܦܘܼܠܚܵܢܵܝ̈ܗܝ ܠܵܐ ܥܵܒ̣ܕܝܼܬܘܿܢ: ܣܵܒܵܒ ܕܟܹܐ ܐܵܡܪܝܼ ܘܠܹܐ ܥܵܒ̣ܕܝܼ. 4ܣܵܒܵܒ ܟܹܐ ܐܵܣܪܝܼ ܟܵܪ̈ܵܬܹܐ ܝܵܩܘܿܪܹ̈ܐ ܘܥܲܣܩܵܐ ܠܸܛܥܵܢܵܐ: ܘܟܹܐ ܡܲܬܒ̣ܝܼ ܥܲܠ ܪ̈ܘܼܦ̮ܫܵܢܹܐ ܕܒܢܲܝ̈ܢܵܫܵܐ: ܐܝܼܢܵܐ ܐܵܢܝܼ ܒܨܸܒܥܵܝܗܝ ܠܹܐ ܒܵܥܝܼ ܕܕܵܩܪܝܼ ܒܝܼܵܝܗܝ. 5ܘܟܠܵܝܗܝ ܦܘܼܠܚܵܢܵܝ̈ܗܝ ܟܹܐ ܥܵܒ̣ܕܝܼ ܕܦܵܝܫܝܼ ܚܸܙܝܹܐ ܠܒܢܲܝ̈ܢܵܫܵܐ ܣܵܒܵܒ ܟܹܐ ܡܲܦܬܝܼ ܬܸܦܠܵܝ̈ܗܝ: ܘܟܹܐ ܡܲܪܝܸܟ̣ܝܼ ܬܸܟ̣ܠܵܬܹ̈ܐ ܕܓ̰ܘܼܒܵܬܲܝܗܝ. 6ܘܟܹܐ ܡܲܚܸܒܝܼ ܪܹܫܵܐ ܕܝܬܝܼܒܹ̈ܐ ܒܡܸܫܬܘܼܝܵܬܹ̈ܐ: ܘܪܹܫܵܐ ܕܡܵܘܬܒܹ̈ܐ ܒܟܢܘܼܫܝܵܬܹ̈ܐ. 7ܘܫܠܵܡܵܐ ܒܫܘܼܩܹ̈ܐ: ܘܕܦܵܝܫܝܼ ܩܸܪܝܹܐ ܡ̣ܢ ܐ݇ܢܵܫܹ̈ܐ: ܪܵܒܝܼ. 8ܐܝܼܢܵܐ ܐܲܚܬܘܿܢ ܠܵܐ ܦܵܝܫܝܼܬܘܿܢ ܩܸܪܝܹܐ ܪܵܒܝܼ: ܣܵܒܵܒ ܕܚܲܕَ ܝܼܠܹܗ ܪܵܒܝܼܵܘܟ̣ܘܿܢ: ܘܐܲܚܬܘܿܢ ܟܠܵܘܟ̣ܘܿܢ ܐܵܚܘܿܢܘܵܬܹ̈ܐ ܝܬܘܿܢ. 9ܘܒܵܒܵܐ ܠܵܐ ܩܵܪܹܝܬܘܿܢ: ܠܵܘܟ̣ܘܿܢ: ܒܐܲܪܥܵܐ: ܣܵܒܵܒ ܕܚܲܕَ ܝܼܠܹܗ ܒܵܒܵܘܟ̣ܘܿܢ ܕܒܫܡܲܝܵܐ. 10ܘܠܵܐ ܦܵܝܫܝܼܬܘܿܢ ܩܸܪܝܹܐ ܬܲܓܒܸܪ̈ܵܢܹܐ: ܣܵܒܵܒ ܕܚܲܕَ ܝܼܠܹܗ ܬܲܓܒܸܪܵܢܵܘܟ̣ܘܿܢ: ܡܫܝܼܚܵܐ. 11ܐܝܼܢܵܐ ܗ̇ܘ ܕܝܼܠܹܗ ܓܘܼܪܵܐ ܓܵܘܵܘܟ̣ܘܿܢ: ܒܸܬ ܗܵܘܹܐ ܐܸܠܵܘܟ̣ܘܿܢ ܚܸܠܡܲܬܟܵܪ. 12ܘܡ̇ܢ ܕܡܵܪܸܡ ܓܵܢܹܗ ܒܸܬ ܦܵܐܹܫ ܡܘܼܡܟܸܟ̣ܵܐ: ܘܡ̇ܢ ܕܡܲܡܟܸܟ ܓܵܢܹܗ ܒܸܬ ܦܵܐܹܫ ܡܘܼܪܡܵܐ. 13ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܐܵܟ̣ܠܝܼܬܘܿܢ ܒܵܬܹ̈ܐ ܕܐܲܪ̈ܡܸܠܝܵܬܹܐ: ܘܒܗܲܓ̰ܲܬ ܡܲܪܝܘܼܟܹܐ ܝܬܘܿܢ ܨܠܵܘܵܬܵܘ̈ܟ̣ܘܿܢ: ܣܵܒܵܒ ܕܐܵܗܵܐ ܒܸܬ ܩܵܒ̇ܠܝܼܬܘܿܢ ܕܝܼܘܵܢ ܙܵܘܕܵܐ. 14ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܟܹܐ ܕܵܒ̣ܪܝܼܬܘܿܢ ܡܲܠܟܘܼܬܵܐ ܕܫܡܲܝܵܐ ܩܵܕَܡ ܒܢܲܝ̈ܢܵܫܵܐ: ܣܵܒܵܒ ܠܵܐ ܐܲܚܬܘܿܢ ܒܸܥܒܼܵܪܵܐ ܝܬܘܿܢ: ܘܠܵܐ ܠܥܵܒܼܪ̈ܵܢܹܐ ܒܸܫܒ̣ܵܩܵܐ ܝܬܘܿܢ ܕܥܵܒܼܪܝܼ. 15ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܚܵܕܪܝܼܬܘܿܢ ܝܵܡܵܐ ܘܒܸܪܙܵܐ: ܠܸܥܒ̣ܵܕܵܐ ܚܲܕَ ܢܘܼܟܼܪܵܝܵܐ: ܘܐܝܼܡܲܢ ܕܗَܘܹܐܠܹܗ: ܟܹܐ ܥܵܒ̣ܕܝܼܬܘܿܢ ܠܹܗ ܒܲܪ ܒܪܘܿܢܵܐ ܓܹܗܲܢܵܐ ܚܲܕَ ܒܬܪܹܝ ܥܲܠܵܘܟ̣ܘܿܢ. 16ܘܵܝ ܐܸܠܵܘܟ̣ܘܿܢ: ܬܲܓܒܸܪ̈ܵܢܹܐ ܣܸܡܝܹ̈ܐ: ܕܟܹܐ ܐܵܡܪܝܼܬܘܿܢ: ܡ̇ܢ ܕܝܵܡܹܐ ܒܗܲܝܟܠܵܐ: ܠܹܐ ܝܠܹܗ ܚܲܕ݇ ܡܸܢܕܝܼ: ܐܝܼܢܵܐ ܡ̇ܢ ܕܝܵܡܹܐ ܒܕܲܗܒ̣ܵܐ ܕܓܵܘ ܗܲܝܟܠܵܐ ܟܹܐ ܗܵܘܹܐ ܡܵܪܵܐ ܕܓܢܵܗܵܐ. 17ܝܵܐ ܐܲܗܡܲܩܹ̈ܐ ܘܣܸܡܝܹ̈ܐ: ܣܵܒܵܒ ܐܲܝܢܝܼ ܝܠܹܗ ܓܘܼܪܵܐ: ܕܲܗܒ̣ܵܐ: ܝܲܢ ܗܲܝܟܠܵܐ ܕܟܹܐ ܩܵܕܸܫ ܠܕܲܗܒ̣ܵܐ؟ 18ܘܡ̇ܢ ܕܝܵܡܹܐ ܒܡܲܕܒ̱ܚܵܐ ܠܹܐ ܝ݇ܠܵܗ̇ ܚܲܕَ ܡܸܢܕܝܼ: ܐܝܼܢܵܐ ܡ̇ܢ ܕܝܵܡܹܐ ܒܩܘܼܪܒܵܢܵܐ ܕܥܲܠܘܼܗܝ ܟܹܐ ܗܵܘܹܐ ܡܵܪܵܐ ܕܓܢܵܗܵܐ. 19ܝܵܐ ܐܲܗܡܲܩܹ̈ܐ ܘܣܸܡܝܹ̈ܐ: ܣܵܒܵܒ ܐܲܝܢܝܼ ܝܠܹܗ ܓܘܼܪܵܐ: ܩܘܼܪܒܵܢܵܐ: ܝܲܢ ܡܲܕܒܚܵܐ ܕܟܹܐ ܩܵܕܸܫ ܠܩܘܼܪܒܵܢܵܐ. 20ܡ̇ܢ ܗܲܕܟ̣ܵܐ ܕܝܵܡܹܐ ܒܡܲܕܒܚܵܐ: ܟܹܐ ܝܵܡܹܐ ܒܝܹܗ: ܘܒܟܠ ܡܸܢܕܝܼ ܕܐܝܼܬ ܥܲܠܘܼܗܝ. 21ܘܡ̇ܢ ܕܝܵܡܹܐ ܒܗܲܝܟܠܵܐ: ܟܹܐ ܝܵܡܹܐ ܒܝܹܗ ܘܒܡ̇ܢ ܕܥܵܡܸܪ ܒܝܹܗ. 22ܘܡ̇ܢ ܕܝܵܡܹܐ ܒܫܡܲܝܵܐ: ܟܹܐ ܝܵܡܹܐ ܒܟܘܼܪܣܝܹܗ ܕܐܲܠܵܗܵܐ: ܘܒܡ̇ܢ ܕܝܵܬܸܒ̣ ܥܲܠܘܼܗܝ. 23ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ ܕܟܹܐ ܝܵܗَܒ̣ܝܼܬܘܿܢ ܡܲܥܣܵܪܹ̈ܐ: ܢܲܥܢܵܐ ܘܫܸܒܸܬ ܘܟܲܡܘܼܢܵܐ: ܘܫܒܸܩܠܵܘܟ̣ܘܿܢ ܫܘܼܠܹ̈ܐ ܡܝܘܼܩܪܹ̈ܐ ܕܢܵܡܘܿܣܵܐ: ܕܝܼܘܵܢ ܘܪ̈ܲܚܡܹܐ ܘܗܲܝܡܵܢܘܼܬܵܐ. ܐܝܼܢܵܐ ܐܲܢܹܐ ܘܵܓ̰ܸܒ ܝܼܗ݇ܘܵܐ ܕܥܵܒ̣ܕܝܼܬܘܿܢ: ܘܐܵܢܝܼ ܠܵܐ ܫܵܒ̣ܩܝܼܬܘܿܢ. 24ܬܲܓܒܸܪ̈ܵܢܹܐ ܣܸܡܝܹ̈ܐ: ܕܟܹܐ ܨܵܦܝܼ ܒܲܩܬܵܐ ܘܒܲܠܥܝܼ ܓܘܼܡܠܵܐ. 25ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܕܵܟ̣ܝܼܬܘܿܢ ܠܒܵܬَܪܹܗ ܕܟܵܣܵܐ ܘܕܙܵܒ̣ܘܿܪܵܐ: ܐܝܼܢܵܐ ܠܓܵܘܵܝܝܼ ܡܸܠܝܹܐ ܝܢܵܐ ܓܢܵܒܼܵܐ ܘܥܵܘܠܵܐ. 26ܝܵܐ ܦܪ̈ܝܼܫܹܐ ܣܸܡܝܹ̈ܐ: ܕܵܟ̣ܝܼ ܩܵܕَܡܵܝܬܵܐ ܓܵܘܹܗ ܕܟܵܣܵܐ ܘܕܙܵܒ̣ܘܿܪܵܐ: ܕܗܵܘܹܐ ܐܘܼܦ ܒܵܬَܪܵܝܗܝ ܕܸܟ̣ܝܵܐ. 27ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܕܵܡܝܼܬܘܿܢ ܠܩܲܒ̣ܪܹ̈ܐ ܡܘܼܚܘܸܪܹ̈ܐ: ܕܡ̣ܢ ܠܒܲܕܲܪ ܟܹܐ ܦܵܝܫܝܼ ܚܸܙܝܹܐ ܫܲܦܝܼܪܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ ܡܸܠܝܹܐ ܝܢܵܐ ܓܲܪ̈ܡܹܐ ܕܡܝܼܬܹ̈ܐ ܘܟܠܵܗ̇ ܛܲܢܦܘܼܬܵܐ. 28ܗܲܕܟ̣ܵܐ ܐܘܼܦ ܐܲܚܬܘܿܢ ܡ̣ܢ ܠܒܲܕܲܪ ܟܹܐ ܦܵܝܫܝܼܬܘܿܢ ܚܸܙܝܹܐ ܠܒܢܲܝ̈ܢܵܫܵܐ ܐܲܝܟܼ ܙܲܕܝܼܩܹ̈ܐ: ܐܝܼܢܵܐ ܡ̣ܢ ܠܓܵܘܵܝܝܼ ܡܸܠܝܹܐ ܝܬܘܿܢ ܡܲܣܲܒ̣ ܒܐܲܦܘܼܬܵܐ ܘܥܵܘܠܵܐ. 29ܘܵܝ ܐܸܠܵܘܟ̣ܘܿܢ: ܣܵܦܪܹ̈ܐ ܘܦܪ̈ܝܼܫܹܐ: ܢܵܣܒܲܝ̈ ܒܐܲܦܹ̈ܐ: ܕܟܹܐ ܒܵܢܹܝܬܘܿܢ ܠܩܲܒ̣ܪ̈ܵܘܵܬܹܐ ܕܢܒ̣̈ܝܹܐ: ܘܣܵܩܠܝܼܬܘܿܢ ܠܒܹܝܬ ܩܒ̣ܘܼܪܹ̈ܐ ܕܙܲܕܝܼܩܹ̈ܐ. 30ܘܟܹܐ ܐܵܡܪܝܼܬܘܿܢ: ܐܸܢ ܗܵܘܵܚ ܗ݇ܘܵܘ ܒܝܵܘܡܵܢܹ̈ܐ ܕܒܵܒܵܘ̈ܵܬܲܢ: ܠܹܐ ܗܵܘܵܚ ܗ݇ܘܵܘ ܥܲܡܵܝܗܝ ܫܵܪ̈ܝܼܟܹܐ ܒܕܸܡܵܐ ܕܢܒ̣̈ܝܹܐ. 31ܒܲܣ ܒܸܣܗܵܕܵܐ ܝܬܘܿܢ ܥܲܠ ܓܵܢܵܘܟ̣ܘܿܢ: ܕܒܢܘܿܢܹ̈ܐ ܕܐܵܢܝܼ ܝܬܘܿܢ ܕܩܛܹܠܗܘܿܢ ܠܢܒ̣̈ܝܹܐ. 32ܐܘܼܦ ܐܲܚܬܘܿܢ ܡܠܹܐܡܘܿܢ ܡܫܘܼܚܬܵܐ ܕܒܵܒܵܘܵܬܵܘ̈ܟ̣ܘܿܢ. 33ܚܘܼܘܵܘܵܬܹ̈ܐ: ܙܲܪܥܵܐ ܕܐܵܟܸܕܢܹ̈ܐ: ܕܵܐܟ̣ܝܼ ܒܸܬ ܥܵܪܩܝܼܬܘܿܢ ܡ̣ܢ ܕܝܼܘܵܢ ܕܓܹܗܲܢܵܐ. 34ܣܵܒܵܒ ܕܐܵܗܵܐ: ܗܵܐ: ܐܵܢܵܐ ܫܵܕܘܿܪܹܐ ܝܘܸܢ ܠܟܸܣܠܵܘܟ̣ܘܿܢ ܢܒ̣̈ܝܹܐ: ܘܚܲܟܝܼܡܹ̈ܐ: ܘܣܵܦܪܹ̈ܐ. ܡܸܢܵܝܗܝ ܒܸܬ ܩܵܛܠܝܼܬܘܿܢ ܡܵܚܹܝܬܘܿܢ ܠܙܩܝܼܦܵܐ: ܘܡܸܢܵܝܗܝ ܒܸܬ ܓ̰ܲܢܓ̰ܸܪܝܼܬܘܿܢ ܓܵܘ ܟܢܘܼܫܝܵܬܵܘ̈ܟ̣ܘܿܢ: ܘܛܵܪܕܝܼܬܘܿܢ ܠܗ݇ܘܿܢ ܡ̣ܢ ܡܕܝܼܢَܬܵܐ ܠܡܕܝܼܢَܬܵܐ. 35ܗܲܕܟ̣ܵܐ ܕܐܵܬܹܐ ܥܲܠܵܘܟ̣ܘܿܢ ܟܠܹܗ ܕܸܡܵܐ ܕܙܲܕܝܼܩܹ̈ܐ ܫܘܼܦܟ̣ܵܐ ܥܲܠ ܐܲܪܥܵܐ: ܡ̣ܢ ܕܸܡܹܗ ܕܗܵܒܹܝܠ ܙܲܕܝܼܩܵܐ: ܗܲܠ ܕܸܡܹܗ ܕܙܟܲܪܝܵܐ ܒܪܘܿܢܹܗ ܕܒܪܲܟ̣ܝܵܐ: ܗ̇ܘ ܕܩܛܹܠܵܘܟ̣ܘܿܢ ܒܹܝܠ ܗܲܝܟܠܵܐ ܠܡܲܕܒܚܵܐ. 36ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܐܵܬܝܼ ܐܲܢܹܐ ܟܠܵܝܗܝ ܥܲܠ ܕܐܵܗܵܐ ܐܘܼܓ̰ܵܓ̣. 37ܐܘܿܪܸܫܠܸܡ: ܐܘܿܪܸܫܠܸܡ: ܩܵܛܠܵܢܬܵܐ ܕܢܒ̣̈ܝܹܐ: ܘܪܵܓ̰ܡܵܢܬܵܐ ܕܐܵܢܝܼ ܕܝܼܢܵܐ ܫܘܼܕܸܪܹܗ ܠܟܸܣܠܘܼܗ̇! ܟܡܵܐ ܓܵܗܹ̈ܐ ܒܣܸܡܠܵܐ ܠܝܼ ܕܓ̰ܲܡܥܸܢ ܒܢܘܿܢܵܟ̣ܝ̈: ܐܲܝܟܼ ܕܓ̰ܲܡܥܵܐ ܟܬܵܝܬܵܐ ܙܲܥܝܘܼ̈ܗ̇ ܬܚܘܿܬ ܓܘܼܠܦܵܢܘܼ̈ܗ̇: ܘܠܵܐ ܒܣܸܡܠܵܐ ܠܵܘܟ̣ܘܿܢ. 38ܗܵܐ: ܦܝܵܫܵܐ ܝܠܹܗ ܫܒ̣ܝܼܩܵܐ ܐܸܠܵܘܟ̣ܘܿܢ ܒܲܝܬܵܘܟ̣ܘܿܢ ܚܵܪܵܒܵܐ. 39ܣܵܒܵܒ ܕܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܚܵܙܹܝܬܘܿܢ ܠܝܼ ܡܐܵܕܝܼܵܐ: ܗܲܠ ܕܐܵܡܪܝܼܬܘܿܢ: ܒܪܝܼܟ̣ܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ.